شعر آذری : فالچیام : فالچی قارداش قاپودا دورما بویور گل ایچری

شعر آذری : فالچیام : فالچی قارداش قاپودا دورما بویور گل ایچری

شعر به زبان ترکی

فالچی قارداش قاپودا دورما بویور گل ایچری
باجووین بیر ایکی ساعت سنه وار دردسری

منه آچ بیر کتاب آغزی نظر ائت طالعیمه
دولانیم باشیوه ای جنیلرین تاج سری

الیمون یوخ نمکی هر کسه خوشلیق ائدیرم
عوضینده اولورام تیر جفانون سپری

قینانام، قینیم، اریم دشن اولوبلار هاموسی
بالدیزیم خشک اولا قویمور گوزیمون اشگ تری

بیرده دود ایلدی گلین گلمیشم اولمور اوشاقیم
چوخ دوالر یمیشم اولمیوب اما ثمری

فالچی بیر مشتریانه خانما سالدی نظر
اکمیوب مثلینی گوردی بو جهانون پدری

آغزی فندق، دوداقی پسته، یوزی قرمزی گل
چکه بولمز بئله بیر نقشه نی چین نقشه گری

حلقه زلفده بیر خالی اولوب نقطه نون
پرتو روئی سالوب حیرته قرص قمری

شوخ دوروب سینه ده بیر جوت م.. مثل انار
مست ائدیر نرگس شهلالری صاحب نظری

دئدی آدون دئدی قارداش کنیزون ماه زرم
آتامون آدی محمد آنامون آدی زری

اگلشوب آچدی کتابین ائدوب اوراقه نظر
یوزینه قویدی الین فکره گئدوب بیر قدری

خانمون عشقی ائدوب طاقتینی زیر و زبر
گوردی مشگل گوزی درک ایلیه زیر و زبری

نه خانم گپریگی اوخ قاشلاری مانند کمان
صید ائدر گونده اوتوز دل کسه گر رهگذری

آغ بلوز قرمزی دامن ساری لیفکیک قره خوت
باشدا فر، قولدا قیزیل ساعتی، نایلون کمری

چکدی بیر آه باشین قوزادی باخدی خانما
یازیقین مزرعه صبرینه سالدی شرری

دئدی ای وای نه گورورسن دی گوروم فالچی داداش
سنی تاری باشیمون وار نه قضا و قدری

دئدی جادو ائلیوبلر سنه بیچاره باجی
سم فاتل اولی سن هر کسه وئرسون شکری

بیر کوله بوی، ساری توک واردی کمینونده سنون
اودی برپا ائلین آی باجی بو فتنه لری

بیر زبان بند دعاسی یازارام قینانووا
بیرده بیر یاخشی محبت دعاسی مختصری

قینووین بالدیزیون باغلارام آغزین دیلینی
قویمارام بیر نفر اولسون سنه بو ائوده جری

گوبگون دوره سینه بیر طلسم وار یازارام
چوخ مجربدی وار اولاد ایچون آرتوخ اثری

سیه پونزا ساری موم بیرده اوچ آرشین همایون
یدی رنگ ساپله من رفع ائدرم بو کدری

یازمارام اوزگیه اما سنه خاطر یازارام
جنلردن بو دعانون منه چوخدور خطری

خرجی چوخدور ولی سندن آلارام اللی تومن
زعفرانیله گرک قاطی ایدم مشگ تری

آلدی بو سوزلر الیندن خانمون صبر و قرار
دئدی واللهی بودور باطل ائدن سحر لری

دوردی یخدانی آچوب تئز چیخادوب بیر بالا کیف
او کیف آرتوردی همان فالچیا نور بصری

دئدی بو پوللاری قارداش کشیدن جازلامیشام
ساتمشام یاغ دوگی، قند چای، اریمون یوخ خبری

سنده بیر نحو ائله گلسون اله الله رضاسی
راحت ایله بو بلادن من خونین جگری

برکیدیب پوللاری قوینوندا او ابلیس زمان
دئدی س... باباوین انگینه بیل مختصری

چیخادوب بیر طبقه کاغذ ائدوب جزما قره
دئدی آرتوخدی قلیجدان بو دعانون کسری

خانمون وقتی او وقت اولدی یازیلسون گوبگی
قوزیوب دامنینی شوقیله اول شوخ پری

ایستدی فالچی دواته یتوره سر قلمی
قلعه نین اوسته وورا پرچم فتح و ظفری

میرزانی قویمادی مقصوده یته دست قضا
قاپودان فورا او ساعت خانمون گیردی اری

فالچینون پیسرینه سالدی بش آلتی شاپالاق
قشقروب آی گلون ئولدیردیله میرزا صفری

فالچی قورتولدی قاچوب نوبه یتیشدی خانما
او محبت دعاسی یاخشی باغشلور اثری

ال اتوب توکلرینه چکدی اوطاقدان ائشیگه
ساوریلوب جوجه کیمی هر طرفه موی سری

گلدی همسایه لر اخرده تماشایه تمام
کوچیه سس دوشوب ئولدیردی اری ماه زری

ووردی آنجاق خانما نه یموسن ترشلی آش
ازیلوب قول قیچی قوش تم داغیلوب بال و پری

ئولوسین آلدیلار القصه الیندن کیشینون
آند ایچوب ساخلامارام من داخی بو بد گهری

عمری صرف ائتدی کریمی دئمه لهو و لعبه
بیر نصیحتدی اگر لطفیله قیلسان نظری

بعضی مردان خطا دیده و عیار شرور
دولانور فالچی لباسینده گزور کوچه لری

آللادور بینوا عورتلری مین حیله ایله
چکوری هم کئفینی هم جمع ائدور سیم و زری

اویان ایرانلی خانم یوخلاماق ایامی دگول
خلقین آفاقی دوتوب شهرت فضل و هنری

گون چیخوبدور هله سن تازه دوشوبسن یوخویا
سنی بیدار ائلمز بانگ خروس سحری

عورته ئوز دیلیدور عمده محبت دعاسی
دیلینن رام ائدر سن انسان ئوزینه شیر نری

اول اخلاقیوی اصلاح ائله ساشما گلنی
دیلینن وورما گلن هر دیله بیر نیشتری

خوش دیلون اولسا تمام عیبلرون گوزدن ایتر
دیلیدی محبوب ائلین خلقین ایچینده بشری

باغلا قرآنین اوزین صاق قولا یوخ فایده سی
بقره سوره سی انسان ائلینمز بقری

اثر طبع حاج میرزا حسین کریمی مراغه ای

۱۳۹۷/۰۶/۰۹

آموزش آفیس/ویندوز/شبکه/...

آموزش آفیس/ویندوز/شبکه/...

آموزش آفیس/ویندوز/شبکه/...

آموزش برنامه نویسی

حسابداری

ریاضی و فیزیک

زبان

سایر آموزشها

خوش آموز درخت تو گر بار دانش بگیرد، به زیر آوری چرخ نیلوفری را