شعر آذری : عزرائیل و مریض : منی مامور ائلیوب خالق سبحان حاج آقا

شعر آذری : عزرائیل و مریض : منی مامور ائلیوب خالق سبحان حاج آقا

شعر به زبان ترکی

منی مامور ائلیوب خالق سبحان حاج آقا
قبض روح ائتماقا گلدیم سنی الان حاج آقا
وئردی مستنطق رحلت منه فرمان حاج آقا

وقت قورتاردی نفس چکماقا قادر دگوسن
آلورام جانیوی سس چکماقا قادر دگوسن

مریض

آی علی آی ولی وای دورون اوغلان ایاقا
کیمدی بو بی ادبانه بئله گیردی اطاقا
بو صفتده بشر اولماز باشی بنزیر بالاقا

نه سلام ائتدی نه تعظیم عجب هیوه ره دی
چاتدادای باغریم اماندی بو نه بد منظره دی

عزرائیل

کیشی قشقیرما علی یا ولی گورمزله منی
منه مردم ملک الموت دیللر علنی
گلمیشم من اپارام محضر معبوده سنی

داخی بوندان بویانا بیر کسه آمر دگوسن
وقت قورتاردی نفس چکماقا قدر دگوسن

مریض

منی عفو ایله داداش بیلمدیم عزرائیل سن
شکر لله سن اوزون بیر ملک کامل سن
خدمتون فرضیدی پیک ملک عادل سن

اوتی بیر چای گتوسونلر هله تعجیل ائلمه
صبر هر ایشده گوزلدور بئله تعجیل ائلمه

عزرائیل

کیشی اوخشاتما منی قونشووز عبدالکریمه
من بو دنیا سولارین ایچمرم افسانه دئمه
من طلبکار دگولم چوخ دیله تونما سریمه

چوخ قالورسان هله بو دیللره ماهر دگوسن
وقت قورتاری نفس چکماقا قادر دگوسن

مریض

سنه بنزر بیری گلمیشدی بیر آز بوندان ازل
چوخ خوش اخلاق صداقتلی نظافتلی گوزل
کیمیمیش او سنه قربان اولوم ای پیک تجل؟

نه دیوم عینا اونون باشی سنون باشیویدی
بولمورم اوغلویدی یا بالا قارداشیویدی

عزرائیل

عمو دکتردی او، اوغلوم دگی، یولداشدی منه
قبض روح ائتماغا یولداش ندی قارداشدی منه
خیلی ماهردی بو ایشده آتادان باشدی منه

گوردوم اما سن اونا قوشمالی خاسر دگوسن
وقت قورتاردی نفس چکماقا قادر دگوسن

مریض

دوزدی مامور ائلیوبدور سنی خلاق حکم
بلکه سن سهو ائلیوبسن او دیه ن من دگولم
هله مندن قوجالار وار نه روادور من ئولم

گرچه زحمتدی قیت بیر سوروش اوندان صورا گل
آدیمی شغلیمی گئت بیر سوروش اوندان صورا گل

عزرائیل

کیشی آغریتدی منیم باشیمی بو طول کلام
اللی مین ایل جان آلان سهو ائلمز اولما عوام
عمووی عمه وی اجدادیوی بیر بیر تانیرام

سن مگر مصطفی خان اوغلی مظاهر دگوسن
وقت قورتاردی نفس چکماقا قادر دگوسن

مریض

من دئدیم اوغلومی داماد ائدرم ائتمه میشم
مشهده کرب و بلایه گئدرم گئتمه میشم
تومنی بیر قرانا وئرماقی ترکیدممیشم

هله آغزیم منیم ایستور تازاجا آشه یته
دگول انصاف بو تئزلقدا باشیم داشه یته

هله اگلش من ئولوم هر نه سورسن گتیسین
منقل حاضردی اگر نشئه چکرسن گتیسین
آبجو، پپسی کوکلا، کنیاک ایچرسن گتیسین

مندن اوچ یوز تومن آل وئر منه مهلت ایکی ایل
باشاباش ایلیوم آسوده عبادت ایکی ایل

عزرائیل

کیشی سارساخلاما نعشه ندی تریاک ندی
آبجو نمنه دی ائشک کیشی کنیاک ندی
قامیوبسان هله مردار ندور پاک ندی

قانماسان چون ائله بیر فاسق فاجر دگوسن
وقت قورتاردی نفس چکماقا قادر دگوسن

من او مامور اداره دگولم رشوه ییم
بش تومن پولدان اوتور بیر کسی بدبخت ائلیم
بئله آسوده اوزانما عمو من گئتمه لیم

ناقصون واردی مگر گئتماقا حاضر دگوسن
وقت قورتاردی نفس چکماقا قادر دگوسن

مریض

ناقصیم چوخدی عزیزیم اولا مشگلدی تمام
سن گئدوب بنده دن عرض ایله خداونده سلام
اوزی انصاف ائلسون وار ایکی اوچ خردا بالام

هله من تازه جوانم ائله گون گورمه میشم
دنیادان دویمامشام بیر ائله کئف سورمه میشم

عزرائیل

باخما سقل سبیلی وئرمیسن اولگوج دمنه
سنی گویا که جوان گورسون عیالون امنه
اللها قویماق اولار بیر بئله دوقوز عمو؟ نه!

یتیشوب یتمیشه سنون گینه شاکر دگوسن
وقت قورتاردی نفس چکماقا قادر دگوسن

مریض

دور گئت ال چک یاخامزدان سن تاری ناسازام
نئچه گوندور یاتیرام باغلی قالوبدور مغازام
خودکارون واردی گوروم اللها بیر نامه یازام

گئتمیرم من بابا غلمانه حور ایسمورم
قوی بو دنیاده قالیم یوخدی که زور ایستمورم

عزرائیل

کیمدی ائشک کیشی غلمان وئره یا حور سنه
حوری معروفه دگول که باش اگه هر گلنه
سوخاجاق مالک دوزخ گ... اودلی شنه

غرق سن معصیته طیب و طاهر دگوسن
وقت قورتاردی نفس چکماقا قادر دگوسن

مریض

دئمه لی مالک دوزخده تیکوب گوز یولوما
گور بو الله نئچه مامور دوزوب صاق صولوما
بیر نفر اینجیده بولمز منی منت پولوما

پولونان مالک نیرانیده آرام ائدرم
گئدرم جنته حوریلریده رام ائدرم

عزرائیل

داخی بوندان صورا مالک دگیسن اوز پولووا
گوروسن اهل عیالون دوزولوب صاق صولووا
ییه جاقلار ایچه جاقلار س... یولووا

بو ائوین دخلینه یا خرجینه ناظر دگوسن
وقت قورتاردی نفس چکماقا قادر دگوسن

گوردی عزرائیل عمو چوخ باخوری بوربوجاقا
گوئیا فکری بودور که ال آپارسین ناجاقا
خده گیندن یاپیشوپ باسدی دئدی یات حاج آقا

ئول کیشی سن دیلیلن گئتمه لی کافر دگوسن
وقت قورتاردی نفس چکماقا قادر دگوسن

ایش اورا یتدی ائو اهلی هاموسی آغلادیلار
حاجینین دسمالینان گوزلرینی باغلادیلار
بعضی قاچدی کفنه بعضیسی سو داغلادیلار

دست قدرت حاجینون تختینی تابوت ائلدی
نازپرور بدنین جانوره قوت ائلدی

دعوا باشلاندی مال اوسته حاجینون وای حالنا
باجی قارداشه دیور : پ... دده وین سقالینا
کوره کن گه یالنا س... گهی یوپالنا

نئچه گوندن صورا آرواددا گئدوب اوزگه اره
بیر نفر گلدی تصاحب ائلدی سیم و زره

ای کریمی نه گوزل دوزلی حکایت یازیسان
ائتموسن شام و سحر یازماقا عادت یازیسان
ظاهرا مسخره باطنده نصیحت یازیسان

سوزیوون قیمتی وار گئچمه لی شاعر دگوسن
وار الون شعریده اما هله ذاکر دگوسن

خوش او شخصه اوزی اعمالینی اصلاح ائلیه
ارجعی لفظین ائشیدجک اوزی لبیک دییه
خلعت اخرتی اگنینه عزتله گییه

روبرو اولدی همان لحظه که عزرائیلیلن
گوله عزرائیله گورجک آلا جانین گلیلن

اثر طبع حاج میرزا حسین کریمی مراغه ای

۱۳۹۷/۰۶/۱۴

آموزش آفیس/ویندوز/شبکه/...

آموزش آفیس/ویندوز/شبکه/...

آموزش آفیس/ویندوز/شبکه/...

آموزش برنامه نویسی

حسابداری

ریاضی و فیزیک

زبان

سایر آموزشها

خوش آموز درخت تو گر بار دانش بگیرد، به زیر آوری چرخ نیلوفری را